POWEREXPO ALMATY ЖӘНЕ KAZATOMEXPO 2026 КӨРМЕЛЕРІ ЭНЕРГЕТИКА САЛАСЫНДАҒЫ ХАЛЫҚАРАЛЫҚ ЫНТЫМАҚТАСТЫҚТЫ ДАМЫТУ ҮШІН 10 ЕЛДЕН 240 КОМПАНИЯНЫ БІРІКТІРЕДІ
2026 ЖЫЛҒЫ 21–23 ҚАЗАН АРАЛЫҒЫНДА АЛМАТЫДА «ЭНЕРГЕТИКА, ЭЛЕКТРОТЕХНИКА ЖӘНЕ ЭНЕРГЕТИКАЛЫҚ МАШИНА ЖАСАУ» 24-ШІ ҚАЗАҚСТАНДЫҚ ХАЛЫҚАРАЛЫҚ КӨРМЕСІ – POWEREXPO ALMATY 2026 ЖӘНЕ «АТОМ ЭНЕРГЕТИКАСЫ ЖӘНЕ ӨНЕРКӘСІБІ» 9-ШЫ ҚАЗАҚСТАНДЫҚ ХАЛЫҚАРАЛЫҚ КӨРМЕСІ – KAZATOMEXPO 2026 ӨТЕДІ.
Үш күн бойы көрме алаңы жабдық өндірушілер мен жеткізушілерді, энергетикалық компаниялардың, өнеркәсіп секторының, сарапшылар қауымдастығының және салалық ұйымдардың өкілдерін біріктіреді.
2026 жылы екі көрменің бірлескен экспозициясы 10 елден 240 компанияны біріктіреді: Аустрия, Беларусь, Германия, Қазақстан, Қытай, Ресей, Польша, Түркия, Франция және Чех Республикасы. Мордовия Республикасы, Самара және Челябі облыстары жеке ұжымдық стендтермен таныстырылады. Бұл ретте 148 компания көрмеге алғаш рет қатысып, экспоненттер құрамы мен ұсынылатын шешімдер ауқымын едәуір кеңейтеді.
Қатысушылар арасында Alageum Electric, AKSA Power Generation, EAE Elektrik, MWM Austria, Астана электротехникалық зауыты, Қазақстан арматура-оқшаулағыш зауыты, Курск электр аппаратурасы зауыты, Линкмастер Қазақстан, Каз Энерго Пауэр, Силумин-Восток, Таврида Электрик, Патнефть-Пресскомпозит, Өскемен конденсатор зауыты, ЭКРА Қазақстан, Electroshield Almaty, Cansu Construction, Қазақстандағы Rohde & Schwarz, TE Connectivity Energy GmbH, Kazenergy Detection (MEGGER), INNIO Jenbacher және басқа да компаниялар бар.
Powerexpo Almaty 2026 экспозициясы заманауи энергетиканың негізгі бағыттарын қамтиды: электротехникалық жабдық және энергетикалық машина жасау, кабельдік-өткізгіш өнімдер, жаңартылатын және баламалы энергетика, автоматтандыру және цифрландыру (технологиялық процестерді басқарудың автоматтандырылған жүйелері), энергия үнемдеу және жылумен жабдықтау, өнеркәсіптік жарық техникасы.
Сонымен қатар Kazatomexpo 2026 атом саласына арналған мамандандырылған шешімдерді ұсынады. Тақырыптық бөлімдер атом электр стансаларын жобалауды, олардың инжинирингі мен құрылысын, ядролық реакторларға арналған жабдық пен машина жасауды, АЭС қауіпсіздігінің кешенді жүйелерін, ядролық отын циклін, қалдықтармен жұмыс істеуді және экологиялық технологияларды қамтиды.
Көрменің ланъярдтар бойынша серіктесі – Қазақстан Республикасының ұлттық атом саласын дамыту мақсатында бизнес, ғылым, сарапшылар мен кәсіби қоғамдастық өкілдерін, сондай-ақ халықаралық серіктестерді біріктіретін тәуелсіз салалық ұйым – Атом индустриясын дамыту қауымдастығы (AIDA). Қауымдастықтың миссиясы – өндірісті оқшаулауға, ұлттық жеткізу тізбегін дамытуға және қазақстандық компанияларды жаһандық ядролық салаға интеграциялауға ықпал ету арқылы Қазақстан Республикасының орнықты, қауіпсіз және технологиялық тұрғыдан озық атом саласын дамытуға жәрдемдесу.
Көрмелердің маңызды бөлігі мазмұнды іскерлік бағдарлама болмақ. 21 және 22 қазанда Қазақстанның энергетика жүйесін дамытуға, жылу энергетикасын жаңғыртуға, атом генерациясына, инвестицияларға және цифрлық экономиканың жаңа қажеттіліктеріне арналған пленарлық және стратегиялық сессияларды біріктіретін Энергетиктер форумы өтеді.
21 қазанда Форум аясында мына сессиялар өтеді:
Пленарлық сессия: «Алматы энергетикасы: 105 жылдық даму және жаңа өсу нүктелері»;
Стратегиялық сессия: «Болашақ генерациясы: Қазақстанның энергия теңгерімі қандай болуы керек?»;
Стратегиялық сессия: «Қазақстанның жылу энергетикасы: жылу көздері мен жылу желілерін жаңғырту және жаңа технологиялар».
Екінші күні, 22 қазанда, Энергетиктер форумы атом энергетикасына, салалық жобаларды қаржыландыруға және цифрлық инфрақұрылымды дамытуға арналған бірқатар сессиямен жалғасады:
«Қазақстанның атом энергетикасы: халықаралық ынтымақтастық, технологиялар және оқшаулау»;
«Энергетикалық жобалардың салықтық және қаржылық архитектурасы: ұзақ мерзімді капиталды қалай тартуға болады?»;
«Цифрлық экономикаға арналған энергия: жасанды интеллект пен деректер орталықтары жаңа тұтынушы ретінде».
Қорытынды күні, 23 қазанда, ҚазЭПИ және Green Platform Kazakhstan ұйымдастыратын III ҚазЭнергоОТП-2026 форумы өтеді. Форумда отандық кәсіпорындардың энергетикалық жобаларды іске асыруға қатысуына, жергілікті өндірісті дамытуға және заманауи технологияларды енгізуге басты назар аударылады.
Форум бағдарламасында:
«Балқаш АЭС-інің жеткізушісі қалай болуға болады?»;
«Қазақстандағы оқшаулауды қалай жеделдетуге болады?»;
«Smart-энергетика – Қазақстанды өзгертетін тренд».
Ауқымды экспозиция мен кәсіби іскерлік күн тәртібінің үйлесуі қатысушылар мен келушілерге заманауи жабдықпен және технологиялық шешімдермен танысып қана қоймай, Қазақстанның энергетикалық кешенін дамытудың негізгі бағыттарын, атом энергетикасының келешегін, инфрақұрылымды жаңғыртуды, өндірісті оқшаулауды, инвестициялық тетіктерді және цифрландырудың салаға әсерін талқылауға мүмкіндік береді.
Powerexpo Almaty 2026 және Kazatomexpo 2026 көрмелері Қазақстан Республикасы Энергетика министрлігінің, Алматы қаласы әкімдігінің, «Атамекен» ҚР ҰКП-ның, KAZENERGY қауымдастығының, «Самұрық-Энерго» АҚ-ның, KEGOC компаниясының, Қазақстан электр энергетикалық қауымдастығының, ҚР энергетик-инженерлер одағының, «Ұлттық энергия үнемдеу орталығы» АҚ-ның, QAZAQ GREEN жаңартылатын энергия көздері қауымдастығының, Қазақстанның энергиямен жабдықтаушы ұйымдар қауымдастығының және Қазақстан энергия аудиторлары қауымдастығының ресми қолдауымен өтеді.
Іскерлік бағдарламаның алтын серіктесі – Assystem компаниясы.
Ұйымдастырушылар – қазақстандық Iteca көрме компаниясы және оның халықаралық серіктесі – ICA Events компаниялар тобы.
